الدنيا شو غريبة
- زبالة
من شي يومين كنت بالدكان عم بستحلي شوكولا وبسكوت
…رواق
التلفزيون داير فوق باب الدكان والدكنجي شارد فيه
أنا أكيد إنو ما عم يحضر شي…بس كان بحالة إنفصام
…رواق
وفجأة من دون لا علم ولا خبر، بيقطحم الدكان ناطور البناية اللي جنب الدكان…يعني جارو للدكنجي الباب بالباب
منظرو وكأنو رايحلو قتيل
أخدتنا شوية وقت (أنا والدكنجي) حتى فهمنا شو القصة
وهي كالتالي: في زبالة مكبوبة بالزاروب بين البنايتين
الناطور: هيدي زبالتكن
الدكنجي: هيدي زبالتكن إنتو، ما أنا بشوفن كيف بيكبكبو شمال ويمين من البلاكين، روح نبه جماعتك
الناطور: هيدي زبلة محلك، بيشترو من عندك وبيكبو بالزاروب. وهودي كراتينك عفنو وجابو جرادين وصراصير. جيب حدا ينضف أو نضفن إنت
الدكنجي: شو شغلتك إنت، شو عندك بالنهار…نضفن وأنا بدفعلك
…
من بعد شي ربع ساعة مناقشة ما فيها مغزى، وأنا ناطر حتى يجمعلي غراضي وحاسبو…صفنت فيهن تنيناتن
…
لقطت الناطور بدينتو ولبجتلو راسو بطاولة الدكنجي
وطرقتو كفين للدكنجي حتى يوعى من الكوما
وجريتن على الزاروب
هيدا إنت وياه الوسخين مش الزاروب
…
شو تفاجأتو…مش مصدقين
!!أنا فناص؟؟
…
إيه معكن حق…ما بتمرق عليكن
بس لو بتعرفوا شو تمنيت إنو اعملها وإرتاح منن تنيناتن
إنو لاقولو حل لهالزاورب ونَضفو بدل ما تتفلسفو على بعض، ما إنت وياه عم تمرقو فيه لهالزروب
هيدي حالتنا بهالبلد
هيدي حالة مصغرة عن هالبلد
بلد مليان زبالة…بلد صارت زبالتو منو وفيه…بلد زبالتو بشعبو
الزاروب ما بيجوي حالو بحالو ولا بينضف حالو بحالو
الزاروب حلو من دون زبالة
وبلدنا حلو من دون زبالة…وصار مليان بالزبالة على انواعها…حتى النفسيات صارت زبالة
بلد صار بدّو تعزيل وإعادة تأهيل…صار بدّو نفضة!
صار لازم نوعى وننفض عنا غبرة الحقد والمصالح ونتخلى عن أنانيّتنا وعجرفتنا
.هيدا بلدنا وقادرين نرَجعو بلدنا اللي منشوف حالنا فيه، ونتخلص من كل هالزبالة اللي عم تتحكم فينا يوم بعد يوم
وحاجي نكب زبالتنا على الجيران، وجيرانا يكبو زبالتن علينا
ليه ما من كون إيد وحدة ومنّضفو لهالبلد…بركي بينضف الزاروب بطريقنا وبتنحل مشكلة الناطور والدكنجي
مش كرمال شي…كرمال يجمعلي غراضي وحاسبو وإمشي
شو ناطرين
!إنو ليه؟
تابع ثقافة الزمّور و ضيعانو فيك
بس بيناتنا أحلى زمور هوّ لمّا تكون واقف على إشارة سير (شغّالة) وحمرا
وفجأة بتصير خضرا
بيقوم اللي وراك أو اللي ورا الوراك أو واحد من الأخر بس مستعجل
بينقر زمور إحتفالاً وإبتهاجاً
!إنو اخضرت شو هينة هيّ مش دايماً بتصير لمين ما كان…بتستاهل أكتر من زمور
!أنا برأيي بدا شي ضربين رصاص بالعالي! إحتفالا وإبتهاجاً
!بأقل من جزء من الثانية بتقوم القيامة كأنّو شي مسابقة أسرع زمّور…وبتربح معنا زمّور
في نهار قصدت زمر وإسبق الكل. هيك بس حتى شوف كيف الشعور
ومن بعد عدة محاولات فاشلة، استسلمت! طلعت مش هينة بدا دراسة وتركيز. من وقتها صرت إحترمهن، إنو مش هينة، الزلمة أو المدام تعبانين حتى وصلو لهيك مستوى من السرعة والتركيز، في مجهود مش بالهين
لاحظت إنو في ناس صارو يعتمدو على الزمور أكتر من الإشارة
.يعني بصف سيارتو بعد الإشارة بطريقة إنو ما يعود شايف الإشارة، وبينطر حتى القطيع ورا يزمرلو لما بتخضر
.وهيك بيعرف إنو اخضرت
والأذكى من هيك في ناس معيرين كل اشارت البلد
بمعنى إنو ولو بعدها حمرا بيمشي وبتخضر هو وبنص التقاطع
هيدا انسان نابغة…بدو تمثال…الحلو إذا اتلاقى نابغتين على نفس الإشارة…بتحترق الطبخة
هيدا التطوّر والثقافة…هيدي حضارة بحد ذاتها ولازم من كل بد نورتها لولادنا وولاد ولادنا ونحافظ على رونقها
!ما هيدا نحن وهيدا جونا
!إنو ليه؟
تابع لضيعانو فيك
تارا تاتا تا و- تا تا تاتاتا ما هايدي كمان زمامير
فكيف بدك تتميز كلبناني…إيه هيك…برافو…زمّر وعبّر
صار زمّورك إلو كلمة ورأي
بس يا مسكين إنت اللي ما إلك رأي
إنت اللي تابع لشي مش عارف شو هوّ
بس أكيد ما بتصير لبناني إذا ما عندك ثقافة الزمّور ومعانيه المختلفة
كتروا كتير الزمامير، لوثتو البحر والبر والجو، وحتى السّمع لوثتوه بقلّة إحترامكن وأخلاقكن
!إنو ليه؟
زمورك يا استاذ مبهم
